नम्रताको रेस्टुराँमा आलु कति महँगो!

निजी भिडियो सार्वजनिक भएपछि विवादमा फँसेकी मोडल तथा नायिका नम्रता बिस्तारै समाजमा स्थापित हुने क्रममा छिन्। सार्वजनिक समारोहहरुमा उनी बिस्तारै देखिँदै छिन् भने साथीहरुसँग मिलेर उनले बिल्कुलै नौलो क्षेत्रमा पनि हात हालेकी छिन्- रेस्टुरेन्ट व्यवसाय। उनको रेस्टुरेन्टमा रोयल भनिएको आलु खान लाग्छ ११० रुपैयाँ। यसमा सर्भिस चार्ज र १३ प्रतिशत भ्याट जोड्नै बाँकी छ। को आउँछन् त उनको रेस्टुरेन्टमा बढी ? आफ्नो रेस्टुरेन्टको विशेष लक्षित वर्ग कोही नभएको उनको बुझाइ छ। ‘सबै खालका मान्छे आउँछन्,’ दुई हातका औंलाका नङ जुधाउँदै नम्रताले भनिन्, ‘विशेष गरी मिडियाका मान्छे बढी आएको पाएकी छु।’ संयोग- एक थरि मिडियाकर्मीकै कारण झण्डै उनको सामाजिक जीवन समाप्त भएको थियो। उनको जवाफमा व्यङ्ग्य मिसिएको थियो कि वास्तविकता, त्यो उनैले जान्ने कुरा। हामी भने बिना योजना पाइला सार्दै त्यहाँ पुगेका थियौँ।
बुधबार दिउँसो हिरोइन नम्रता श्रेष्ठको एट्टिक (बुइँगल) रेष्टुराँमा खाजा खान जाने विषय त्यस्तै एउटा क्षणिक रमाइलो निर्णय थियो। नागरिकन्युजका दोस्त ऋषिकेश दाहाल र अशोक थापासँग एकदम छोटो कुराकानीपछि म खाजाका लागि एट्टिक जान सहमत भएँ।
भिडियो प्रकरणपछि उनी मौन थिइन्। उनको मौनता तोड्न पाइने लोभले हामीले लाजिम्पाट पुरानो आर्किटेक्चरयुक्त घरको तेस्रो तल्लाको बुइँगलसम्म उक्लियौं। बाहिरबाट प्राचीन भए पनि भित्रको फर्निसिङ आधुनिक रहेछ। एकैछिनको प्रतीक्षापछि झुल्किइन्- नम्रता। चन्द्रमाझैं सेतै पहिरनमा। म एक आत्मविश्वासी, परिश्रमी र नयाँ कुरा सिक्न रुचाउने नारी हुँ,’ आफ्नोबारे प्रष्ट पार्दै उनले सुनाइन्। उनले हामीलाई यसो बताइरहँदा उनको दह्रो आत्मविश्वास सजिलै अनुमान लगाउन सकिन्थ्यो। मोडल, रेडियो प्रस्तोतादेखि हिरोइनसम्मको परिचयपछि अब नम्रता आफ्नै रेष्टुराँमा थिइन्। ‘यो मेरो लागि नयाँ अनुभव थियो,’ एक वर्षअघि साथी रेमनसँग मिलेर रेस्टुरेन्ट खोल्नुको कारण उनले सम्झिइन्, ‘नयाँ सोच र आफ्नै किसिमको ह्याङ आउट जङ्क्सनको आवश्यकताका लागि यो खोलिएको हो।’
रेस्टुरेन्ट उनको रुचिकै विषय चाहिँ होइन। यसलाई एउटा प्रयोगात्मक योजनाको परिणाम ठान्छिन्। उनका लागि रेस्टुरेन्ट पूर्ण आर्थिक मुनाफाको विषयभन्दा पनि बढी जनसम्पर्क बिस्तारको बहाना हो। ‘मधुर संगीत, आकर्षक इन्टेरियर डिजाइन र मिठो परिकार यहाँको विशेषता हो,’ यसो भनिरहँदा नम्रता रेस्टुरेन्टकी पक्का ‘मालिक’ लागिरहेकी थिइन्, ‘त्यसैले यहाँका ग्राहक संगीत, शान्त वातावरण अनि मिठो खाना खोज्नेहरू हुन्।’
मनोरञ्जनका लागि बुधबार र शुक्रबार नम्रताको एट्टिकले सांगीतिक कार्यक्रम पनि गर्छ। नयाँ वर्ष, होली लगायतका पर्वमा उनीसँगै भेटिन्छन् सेलिब्रिटीहरू विशेष कार्यक्रमसहित।
फिल्म, मोडलिङ र इभेन्टमा व्यस्त भइरहनुपर्ने हुनाले नम्रताले रेस्टुरेन्टमा त्यति धेरै समय दिन पाउँदिनन्। ‘त्यस्तो बेलामा साथीहरू मिस हुन्छन्, म जहाँसुकै भए पनि मेरो आत्मा यहीँ भएजस्तो लाग्छ,’ उनले सुनाइन्। त्यो आत्मा रेमन त हैन कतै ? प्रश्न मुखमै थियो, उच्चारण गरिनँ। ‘मान्छे पाइलै पिच्छे पाठ सिक्छ, लडेर होस् वा पढेर। मैले बितेको वर्ष दुःख-पीडाबाट बढी सिकेँ’, झन्डै २० मिनेट जतिको प्रश्न-उत्तरपछि नम्रता श्रेष्ठले आफ्नो भिडियो प्रकरणपछिको मनोविज्ञान खुलस्त पारिन्।
प्रभुशमशेर राणाले निर्माण गर्न लागेको ‘पर्पल डेज’को मुख्य भूमिकामा उनी अनुबन्धित भएकी छन्। नेपाली हिरोहरूले समेत एउटा फिल्मको पाँच लाख पाउँदैनन् तर नम्रताले ‘पर्पल डेज’मा पाँच लाख पारिश्रमिक लिएको लुकाइनन्। ‘मेरो खुबीका लागि जति पाउन लायक छ त्यति लिन्छु। कुरा त्यही हो,’ नम्रता कुटनीतिक बनिन्।

'संवैधानिक संकट आए विद्रोह'

काठमाडौ, चैत्र २६ - एमाले उपाध्यक्ष वामदेव गौतमले आफ्नै पार्टी नेतृत्वमा बनेको सरकारका कारण मुलुकमा संवैधानिक संकट आउन लागेको जिकिर गर्दै जेठ १४ पछि पनि स्थितिमा सुधार नआए 'विद्रोह गर्ने' बताएका छन् । त्यस्तो अवस्था उत्पन्न हुन नदिन र राष्ट्रिय सहमति निर्माण गर्न प्रधानमन्त्री माधवकुमार नेपालले राजीनामा दिनुपर्ने माग पनि उनले दोहोर्‍याए ।
उपाध्यक्ष गौतमले जेठ १४ मा संविधान नबने 'क्रान्तिकारी' हरूले विद्रोह गरी पार्टी पुनर्गठन गर्नुपर्ने बताएका हुन् । 'जेठ १४ सम्ममा संविधान बनेन भने त्यसपछि अन्तरिम संविधान समाप्त हुन्छ, प्रधानमन्त्री, राष्ट्रपति सबै अवैध हुन्छन्,' उनले बुधबार कान्तिपुरसँग भने, 'त्यस्तो अराजक अवस्थामा एमाले छिन्नभिन्न हुन्छ । क्रान्तिकारीहरूले पार्टी पुनर्गठन गरी अर्को लोकतन्त्रको स्थापना गर्नेछन् ।'
जेठ १४ मा पार्टी छिन्नभिन्न भएपछि अहिलेको एमालेमा रहेका क्रान्तिकारीलाई आफूले पार्टी पुनर्गठनको आह्वान गर्ने पनि उनले बताए । 'म त्यतिबेलाको परिस्थितिको कुरा गरिरहेको छु,' उनले भने, 'प्रधानमन्त्री माधवकुमार नेपाललाई समर्थन गर्नेहरूले त्यतिबेला पनि सरकारको समर्थन गर्नेछन्, जसलाई जनताले विद्रोह गरी समाप्त पार्नेछन् ।' पार्टी पुनर्गठन गर्दा बहुमत केन्द्रीय सदस्यहरूले साथ दिने उनको दाबी
छ । 'जेठ १४ पछि संविधानसभा नै नहुने भएकाले संसदीय दल भन्ने नै हुँदैन,' गौतमले भने, 'केन्द्रीय कमिटीको बहुमतले पार्टी पुनर्गठन गर्नेछ ।'
एमालेका एक वरिष्ठ पदाधिकारीले भने केन्द्रीय कमिटीमा गौतमको पकड उल्लेख्य नरहेको दाबी गर्दै भने, 'उहाँको कुरा बढी काल्पनिक भयो । उहाँलाई २०५४ को ह्याङओभरले नछोडेको मात्र हो ।' पार्टीको छैटांै महाधिवेशनमा अल्पमत पक्षको नेतृत्व गरेका गौतमलाई २०५४ मा संसदीय दलका ४० प्रतिशत सदस्यले साथ दिएपछि एमाले विभाजित भएको
थियो । उनको नेतृत्वमा नेकपा माले गठन गरिएको थियो । २०५६ को आमनिर्वाचनमा मालेले शून्य सिट ल्याएपछि २०५६ फागुन ३ मा पार्टी एकता गरी गौतम एमालेमै फर्किएका थिए । जनकपुरमा सम्पन्न सातौं महाधिवेशनमा उनी ओलीनिकट थिए भने बुटवलको आठौं महाधिवेशनमा नेपाल र ओलीविरुद्ध झलनाथ खनालको पक्षमा उभिए ।
सरकारकै कारण राष्ट्रिय सहमति नबनेको दाबी गर्दै उनले त्यसमा माओवादीको कत्ति पनि दोष नभएको बताए । 'यो सरकारको गठन नै माओवादी बिना शान्ति प्रक्रिया र संविधान निर्माणलाई पूर्णता दिन सकिन्छ भन्नेहरूले गरेको हो,' उनले भने ।

जेठ १४मा संविधान जारी नहुनेः खनाल

काठमाडौ, वैशाख २ - एमाले अध्यक्ष झलनाथ खनालले जेठ १४ गते संविधान जारी नहुने बताएका छन् । अन्य दलका शीर्षस्थ नेताले तोकिएकै मितिमा संविधान जारी हुने बताइरहेको बेला उनको त्यस्तो अभिव्यक्ति आएको हो ।
उनले जेष्ठ १४ मा संविधान घोषणा हुने उपयुक्त वातावरण नभएको बताए । नयाँ संविधान जारी हुन ४३ दिन मात्र बाँकी रहेको छ । पारिजात स्मृति केन्द्रले उनकै निवासमा बिहीबार बिहान गरेको कविता वाचन कार्यक्रममा खनालले संविधान निर्माण प्रक्रिया र त्यसको अन्र्तवस्तुको कारण तोकिएको मितिमा संविधान निर्माण नहुने दावी गरे ।
'जेठ १४ गते संविधान दिन सक्ने अवस्था विद्यमान छैन,'उनले भने-'अहिले पनि कतिपय मानिसहरु जेठ १४ गते संविधान ल्याउँछौं, ल्याउँछौं भनिरहेका छन् । अब जनतालाई ढाँटन जरुरी छैन । यो यथार्थ हो । प्रक्रिया र अन्र्तवस्तुको हिसाबले यो सम्भव छैन ।'
नयाँ ढंगले अघि बढे दलहरुबीच सहमति कायम हुने उनले बताए । उनले देशमा विद्यमान परिस्थितबाट शिक्षा लिंदै सबै राजनीतिक पार्टीहरु राजनीतिक सहमति तर्फ अघि बढ्ने विश्वास व्यक्त गरे । 'मुलुकले नयाँ सहमति माग गरिरहेको छ,'उनले भने-'निकट भविष्यमै राष्ट्रिय सहमति निर्माण गर्छौं ।'